الكيميا وحدة من المواد اللي ماحدا بيقدر يساعدك فيها ... لانو المجهول ما حدا بيعرف أديش قيمتوا ...
على سبيل المثال دخلت أنت على المخبر و نظفت كل المعدات و بعدين حطيت كل المواد بالترتيب المطلوب ... و الكميات المطلوبة ... مفروض يطلع معك رقم ضمن المجال الطبيعي ؟
بس بتلاقي مشكلة بس ما يطلع معك هل الرقم ... أنت بتصفون هون من شو الخطأ ...
وهي وحدا من الشغلات اللي بتطقق بالكيميا ... غير الاسماء الكتيرة اللي دوماً في صعوبة أنك تحفظها ... في عندك دوماً خطأ بالمواد بسبب خطأ بالنتيجة ... و بتضطر تشلف الرقم مشان ما تروح العلامة ( الرقم اللي بتشلفوا بيكون ضمن المجال الطبيعي ) ...
ولهل السبب بالكيميا مسموح تفوت نوطة على المذاكرة ... لانو ما لح يفيدك شي ... متل هديك المرة بس قال استاذ الرياضيات كحيل ... فيك تفتح الكتاب , بس ما لح تستفيد .. و بالفعل إذا ما بتعرف كتير معلومات بالرياضيات مالح يفيدك شي ...
و أنا هون حكيي ... بالنسبة لطلاب الطب مفروض نتوقع يكون عنا حالات مرضية و بالتالي تكون الشوارد خارج المجال الطبيعي و الجواب اللي خارج المجال هو الصح... و بهل الحال أي شخص بنفذ التجربة مفروض يكتب نتيجتو بدون خوف إذا نفذ الإجراءات بحذافيرها... و بالمقابل عشرة علامات بينقصوك إذا خربطت ,علامة لكل خطأ وهاد الشي بيرسب ... و من هون بدك تقول وداعاً للمنطقية بالتعامل ... أنا مابدي ارسب مشان أكتب الرقم اللي طلع معي ...بدي أكتب الرقم ضمن المجال الطبيعي ...
أي بعد ماخلصت كيميا اليوم رحت مشان شوف شو عم يصير معون بالمسابقة ... و بالفعل متل ماتوقعت المسابقة صارت من نموذج أرسل رسالة لترفع فرصك بالربح ... و ضمن المسابقة حسيت حالي أكلت مسبة ... أنا قاعد و الأنسة عم تحاضر على أساس ... بلشت تحكي على صفات المتميزين أو هيك شي ... و هي كل فترة و فترة عم تزورني ( للملاحظة الزورة كانت بتخوف نسبياً ) ... بعدين وصلت لفقرة المرونة و قالت وشددت بالصوت :
وبعض الفرق فشلت بعرض فكرتها بس لانو ماتحلت بالمرونة ...
وبعدين خسرت التواصل العيني اللي كان عم يصير كل فترة وفترة ... من جهة انبسطت لانو عنجد كنت عم ارتعب بس كانت عم تزورني ... بس حسيت أنو المسبة موجهة إلي ...أي أنا عندي اعتراض , لح يصير معي انفصام بالشخصية , قبل بيوم كنت عم تقولي مفروض ما تستسلم و تضل متمسك بفكرتك , و هلق عم تقولي لازم تكون مرن ... و بعرف أنو الواحد ممكن يتمسك بفكرة و يكون مرن بنفس الوقت ... بس طريقة العرض تبع الآنسة كانت أنو لازم تتحيز لوحدة من هل الشغلات أكتر من التانية ...
طيب و بالنسبة للمسبة يعني فيك أنت تفكر بس تكون عم تحكي بمجموعة وبعدين تمرّق كلمة لشي واحد من هل المجموعة بتتغير طريقة حكيك و بتصير ما بتتواصل أنت و ياه بالعيون ... فيكون تجربوها أنا من جهتي بعرف هل الشعور و بتحس حالك طول الوقت متلبك و أنك على أساس انجزت شي عظيم ....طيب ليش أنا ,والله قاعد و ما عم أعمل شي ... وهاد بيوصلني للنقطة اللي بدي ياها , طالما تصرفت الآنسة بهل الطريقة يعني حاسة أنو في شي يدعو للانزعاج من طرفنا و لما كنت أنا موجود شعرت أنو وجودي مشان أزعجها فكان التصرف من جهتها أنو تتوجه بهجوم علي ... و باعتباري جاي بسلام و اعتبار الشخص الأعلى من ناحية الذكاء(وبكل تواضع) مفروض انا اسعى لخفض حدة الموقف عن طريق إبداء حركة ودية بشكل بحت... "هلق صحيح في قلة احترام من طرفكون بس أنا جاي بس من باب الفضول "...و هون انا تصرفت التصرف الودي تبعي ... مرحبا...؟ شلونك أنسة ؟ نحنا صحيح انسحبنا بس أنا جاي من باب الفضول شوف عم تساووا و بدي شوف شو هي الفكرة الفايزة ... و بالتأكيد لاقى هل التصرف استحسان ... حتى حسيتها كتير صارت ظريفة ... و على فكرة هي الطريقة ممتازة مشان تخلي حدا يحبك ...
مابعرف ليش عم احكي عن هل الشغلة ... بس عم احكي بكل الأحوال ... و للصراحة أنا عم ارتاح بس عم اكتب ... بدون سبب معين من هل 24 ساعة باليوم ... 6نوم البقية بين الدراسة و الأكل وهل النص ساعة هي الوحيدة اللي بتسلى فيها ... و كتير بستمتع ... ولو أني عم اكتب بدون موضوع محدد بس مبسوط ...
بهل المناسبة لازم أدرس مشان مذاكرة النسج الاسبوع الجاي ...
وصح حبيت ضيف هل الشي ... على الأغلب لح ضيف طريقة عرض تانية ... و لح أتوجه لشرح الدروس أكتر من الحكي بدون هدف ... ااااا و بس هاد اللي عندي ...
ومازال العمل مستمراً ...
تم كتابة هذا الموضوع بتاريخ 3/12/2014
