الطبقات ببرامج التصميم ... layers

اليوم تابعت مع محاولاتي بالفيديو ... كتير تحسن مستوى الفيديو عن قبل ...

أولاً صرت أتبع طريقة قريت عنها بالنت و صرت حط الرموز بشكل متسلسل ...

ثانياً زدت عدد الصور بالثانية و هاد عمل الشغل أصعب بكتير بس مع هيك صار الفيديو سلس أكتر بكتير ... 

وثالثاً وهاد أهم الشي ... صرت عم أستخدم  الطبقات مشان سهل عملية التحريك و النسخ ... وهي الشغلة كتييييييييييييير حلوة ...

يعني أنا كنت من زمان حاطط لائحة للأشخاص اللي بيستاهلوا جائزة نوبل ... بس صير المدير الرسمي للجائزة ح خليهون يفوزوا ... (^.^) اللائحة هي :

1. اللي اخترع الفلافل .

2. اللي اخترع البطاطا المقلية .

3. اللي اخترع المطاط .

4. و المرشح تبع اليوم ... اللي خترع الطبقات ببرامج التصميم ...

كان اللي اخترع الألتيكو مرشح ... بس وللأسف بعد ما لزقت أصابيعي بالألتيكو شلتو من القائمة ... (^～^)

المهم من كتر مالي مبسوط باكتشاف الطبقات ( Layers  ) ح سمي الموضوع تبع اليوم بهل الاسم ... لك كتير سهّل الشغل و صار الخط أحلى ... و تقل الصور و تحريكها أسهل بكتير ...

أي ... هاد هو الموضوع الأساسي ... و بدي أحكي كمان عن معلومة ... كمان ح أدرجها ضمن نظرياتي  العظيمة (^～^)

المعلومة قريتها من الباحثون السوريون بتدعم أفكاري عن مفهوم تطور العقل عند الإنسان , بتنص أنو تعلم اللغة بيزيد الوصلات العصبية و بالتالي قدرة الدماغ على التعلم ...

و الشرح :

أولاً : الطفل قبل ما يمتلك القدرة على الحديث و فهم معنى الكلمة بعيداً عن فكرة أنها صوت فقط بيتميز بذكاء مشابه للثديات العليا من دون البشر ( اللي تحت البشر بسلم التطور مباشرة ) ... و بالمختصر المفيد القرود ...

التجارب بتنص على أنو الطفل قادر على مضاهاة قرد بالاختبارات البسيطة القائمة على المنطق و الحركة ... بالمقابل قادر على فهم الاختبارات التي تعتمد على دارات خفية , في حين يعجز القرد عنها .

الخلاصة من الفقرة الأولى : الإنسان بس ببنية الدماغ قادر على التفوق على القرد بنوع واحد من الأختبارات .

ثانياً : تنص التجارب على ان الطفل يبدي تطور ملحوظ من ناحية التنظيم و القدرة على حل المشاكل و التعلم من الخبرات بشكل يفوق قدرة القرد بأشواط ... عندما ( وشدد على عندما ) يبدء بالتعامل مع اللغة بمفهومها ككلمات للتواصل و ليست مفردات ... و هاد  الشي بيصير بعمر الأربع لخمس سنين ...

و الخلاصة من الفقرة الثانية : تطورنا يعتمد على تطوير اللغة .

النظرية اللي خطرت على بالي : باعتبار اللغات بالعالم عديدة ... و كل اللغات تؤدي إلى نفس الأثر مع إختلافات بسيطة ... من الممكن أن نفترض أن لغة معينة تستطيع التأثير على الدماغ بشكل أفضل و تطوره إلى حدود أعلى  ... و بتطوير مجال معين من المصطلحات في هذه اللغة يمكن أن نصل إلى حدود أعلى في الدماغ البشري و بالتالي رفع قدرات الإنسان...

يعني متل الموبايلات بس تحط معالج أقوى بيصير الموبايل قادر على تشغيل برامج أكبر بسهولة أكتر ... و باعتبار اللغة عم تقوي المعالج ( المخ ) ممكن تعلم لغة معينة ( بالتحديد دون أي لغة آخرى ) يجذب ردة الفعل هذه و بالتالي يصل الأنسان لحدود أعلى ...

و بيصير بياع الفلافل بيعلم طب بالجامعة و دكتور الجامعة مسافر عل المريخ .... (*^▽^*)

هلق هاد هو المبدأ الأساسي بتوقع بالتبحر كتير بمجال الدماغ و شي من هل القبيل ممكن يوصل لحل لهل النظرية ... و من كتر مالي عبقري بدال ما أخد جائزة نوبل ... بحطوني المدير تبع توزيع الجوائز و على هل الأساس بكرم اللائحة الفوقانية ... （・∀・）

ممكن تكون النكت بايخة ... بس النظرية عنجد من اختراعي بشكل صرف من دون العودة لحدا ... لك حتى و أنا عم أكتب خطرت على بالي ...

المهم هاد كلشي ... الفيديو ما ح اعرضو من هون لنهاية الأسبوع عم حسنو ليصير كتير حلو ...

و حبيت شارك هل الصورة :

مسودة النسج 

 أنا كتير معجب بأنجازي ...  يعني الرسمة هي مسودة و أنا عم سمع لحالي اللي بعرفو من المذاكرة الجاي ... بس طلعت كتير حلوة المسودة ... المهم هي 20 صورة بس من أصل شي مليون و احد ... لسا في كتير رسمات تانية ...

المهم على ما اعتقد هاد كلشي ...

ومازال العمل مستمراً ...

تم كتابة هذا الموضوع بتاريخ 6/12/2014...