بعتزر لأني مبارح ما قدرت أكتب بالمدونة بس كانت مرشح ... و قلت لحالي خليني اكتب عن الرشح بأعتبار مشكلتو كبيرة و مو بس مشكلتو بالجرثومة مشكلتو كمان بالطريقة اللي عم نتعامل معو فيها ...
طيب شو هي الطريقة الخطأ اللي عم نتعامل فيها مع الرشح؟ ... يعني شو لازم نرحب فيه و نعملوا فنجان أهوة أو شاي أو هيك شي ؟... بالتأكيد لا أنا اللي عم أحكي عن العالم اللي بتوصف من حالها لحالها أدوية و مسكنات و مضاضات إلتهاب على كيفوا ... و ما بيلتزم بالدوا لأخرو و عم يسبب أنو الرشح يقوا يوم على يوم ...
أكيد ما عم أتهم أي واحد بيعمل هل الشي بأنو لح يسبب دمار البشرية بس عم أتهموا أنو هو خطوة من أصل مليون خطوة ... و بلوكة على بلوكة بتطلع بناية ... اللي عم قولوا أنو هل الإنسان باستخدامو مضاد إلتهاب بجرعة مو كاملة عم يأدي لموت الجراثيم الضعيفة و يخلي القوية ... و نحنا بحاجة الضعيفة مشان القوية ما تضل قوية ... بس تكون في جرثومة قوية وجرثومة ضعيفة بيكون الجيل الناتج وسط ممكن الجسم يقاوموا لحالو ... بس لما تكون كل الجراثيم قوية ما بيقدر الجسم يقاومها ... و من هون عم تقوا الأمراض ... يعني بتلاحظوا على التلفزيون و على الدعايات تبع الصابون الجراثيم الفيروسات( و هلق أنتبهت الرشح فيروس مو جرثومة) عم تصير قوية ... يوم على يوم عم تقوا الجراثيم عم تضعف مناعة الإنسان مشان هو يرتاح من الرشح بسرعة و هاد هو السبب ...
اسم الله بس كان الرشح بيخلص بكم عطسة و بس... هلق صار بتنلقح بالتخت كم يوم بعدين بترجع على مود التعطيس ... و الزعلان عليهون أخواتي كمان رشحوا بس حالتون أسوء من حالتي ... بتوقع لأني صبي مفروض يكون جسمي أقوى ضد كلشي ... كمان لأنو ما بتناول اي دوا حتى حب وجع الراس ... يعني هاد المفروض يكون ... هلق أنا ما عم أحكي عن الأدوية الضرورية متل دوا الضغط السكر ... مسكنات الديسك حركات الكلاوي أو هيك شي ... اللي عم أحكي عنو هاد اللي بيفكر يوجعو راسو بياخد خمسين حبة سيتيمول و بندول و بروفين ... بيرشح ياريت بياخد جرعة كاملة من مضاد الالتهاب ... لاااااا لازم ياخد كم حبة هو وصفها لحالو و بيوقفها بس يحس حالو تحسن ...
هاد الكلام و الله مو دعاية للدكاترة مشان يشتغلوا ... لسا بدي 11 سنة قبل ما صير دكتور ... هاد الحكي مشانكون ... مشان كل واحد ما يمرض و يصير فيه شي مزعج ... كلكون سمعتو بالكورونا ... و اللي ما سمع فهو متل ماكنت أنا قبل ما أقرا عنوا ...الفيروس من الفيروسات التاجية لانو عندوا متل هالة حولوا متل التاج ... في من فصيلتو شي ستة فيروسات و احد منون تبع الشرق الأوسط .... الفيروس مو مميت للناس العاديين ... مميت للختايرة و للعندوا مشاكل بالكلاوي ... بس متل ما كنت عم أحكي إزا نزل عند واحد بياخود نص جرعة أدوية بيروحنا كلنا ...
حتى الآن و الحمد الله ما اتسجلت إصابة بسوريا ... واحد من نمازج هاد الفيروس هو السارس اللي انتشر بالصين و سبب مشاكل كبيرة ... المهم هاد كان حديثي عن الرشح ... بزكركم لساتني طالب سنة ...(ما بعرف خلصت الأولى بس لسا ما بلشت التانية ) ... ما لي عبقري ,قريتوا عنو فهمت شو عم يحكو و حكيتلكون ... و بالنسبة لنظريتي هي طريقة تفكير لأنو طالب الطب ما بيتعلم بس أسماء الأعضاء و الأمراض و الأدوية ... بيتعلم كمان كيف يفكر متل الطبيب ..." الجسم هيك بيشتعل إزا عملت هيك لح يصير هيك و هيك و الدوا هاد بيرد بهيك و هيك و هيك ... بينفع الدوا على ما اعتقد " بس المشكلة أنو كلمة هيك صعبة كتييير و هي اللي بدها 11 سنة لنتعلمها متل العالم .
مع كامل تيحاتي لكل مرشح و تمنياتي بالشفاء .
ملاحظة:
ذذذذذذذذ
كنت مضيع حرف الذاي و هلق لقيتو ما لح عيد الكتابة مشان حطو بمحلوا حطيتلكون كم وحدة حطوها أنتو و شكراً .
