مبارح ماكنت ملاقي حرف الذاي لأني عم اشتغل على تاب اشتريتها جديد ... لساتني عم اتعلم عليها و باختصار مالقيت حرف الذال وبعدين بعد تدوير كتير لقيتوا ...المهم ليش اشتريت التاب هلق ,لاني خفت انو يصير معي متل ماصار معنا بالبكلوريا ...
بالبكلوريا الواحد بيضل حاسس حالو مزعوج ومضغوط و خايف ... و بيصل لاخر شي و هي المرحلة اللي بيقدم فيها الفحص ...
بالتأكيد أهلك بيساعدوك وبيوعدوك بشغلات مشان تضل عم تدروس و ما تقصر ... و أنا كانت مكافأتي موبايل جديد ... كان موبايلي نوكيا ن70و كان قديم بس شغال ... حبيت موبايل حلو كتير HTC TITAN و كان حقو 17,000 ليرة للطلاب اللي بسنتي مستحيل ينسو شو صار ... قبل يومين من الوقت اللي بتخلص فيه الفحوصات و الوقت المفروض أهلي يلتزموا فيه بالاتفاق نط الدولار من 50 لـ 100 لـ 200 لـ 400 و صار حق الموبايل اللي بدي ياه 67,000 و بكل بساطة.
يعني شو بقدر أعمل المعالج ضعيف و الشاشة صغيرة و الكميرة ضعيفة و "القناعة كنزٌ لا يفني" صح بس 67,000 ؟؟منين بدي جيب هل 50,000 فرق العملة؟ ... و بعد تعبيري عن انزعاجي لفترة طويلة اقتنعت أنو ماممكن يصير شي يحسن القصة ... بس مع هيك أجاني موبايل هدية من برا سوريا و ممتاز و فر مصاري كتير علي ... هلق بنص هل المعمعة ضليت مع 17,000 ما بيشتروا قشرة موز و مر وقت طويل عليهون حتى صاروا 40,000 و قررت جيب تاب ... لانو ما بتعرف ايمتى بيرجع بيصير نفس الشي ... الشب ما بيقدر يجيب قطعة دهب أو طوق مشان يستفيد من مصاريه قمت قلت لحالي بجيب تاب ... تلت تيام و صار الدولار 172 ليرة يعني زاد 20 ليرة و السوق ما بيرحم لهل السبب قررت اشتريها قبل ما يصير فيي نفس الشي .
ومن هون هاد سبب أني مبارح عم اكتب زاي بدل ذال ... بكل الأحوال هاي هي القصة لهلق مبسوط فيها و بتوقع بتفيديني كتير .
برجع بقول القناعة كنزٌ لا يفنى للي بدوا نصيحة بخصوص هيك شي ...و اصبور إذا بدك تشتري بدك وقت لتوصل لمبلغ محرز و بس ...
تم كتابة هذا الموضوع بتاريخ 11/8/2014 و مازال العمل مستمراً...
ولساتني مبسوط لأني لقيت حرف الذال.
