متل ما كنت عم قول بالمقال اللي قبلو كل العالم بتصير دكاترة من حالا لحالا و خلص ما حدا أدي يا أرض أشتدي ...
مبارح خالتي عندها ولدين بشهر تسعة لح يصير عمرون تلت سنين ... واحد من الولدين سخن باليل ... و أكيد على هل الأوضاع شو ممكن الأهل تعمل؟... و لا شي .
خالتي من رعبتها قررت تعالج الولد لحالها قام عطوت تحميلة ... ماشي أنا لساتني مالي ضد الفكرة تحميلة وحدة ما لح تضر و الولد مرضان ... مشكلتي مو هون بعد نص ساعة (يعني 30 دقيقة ) قررت أنو درجة حرارتو ما نزلت بقا عطتو تحميلة تانية ... ماشي بعد عشر دقايق عطتوا معلقة دوا بروفن ( هاد الدوا إجرام تعطي لولد بهل العمر ) بس العالم عباقرة كتير و بتوصف الأدوية لحالها ... خلص ما في مشكلة ... بعد ساعة قررت تعطي زدناد على ما اعتقد تحميلة ...
بمعنى أخر ولد عمروا تلت سنين أخد تلت تحميلات و معلقة دوا من العيار الثقيل من تلت أدورية مختلفة بساعة و أربعين دقيقة ...؟؟؟ ماشي أنا بس بدي قول هاد إجرام بالجهاز المناعي تبع الولد و إجرام بحق كل العالم اللي لح يتنفسوا نفس الهوا تبع الأوضى لانو الجراثيم اللي ماماتت لح تكون جراثيم قوية ...
باليوم التاني ... ما نزلت حرارة الولد ( مو لانو الأهل اختاروا الخيار الصحيح و المرض كتير قوي ... لا لانو كل دوا بيرقع من محل و بيبخش من مليون محل تاني ) ... و قرروا الأهل ياخدوا الولد عند الدكتور ... بعد مارجعوا من عند الدكتور كانوا عم يقولوا عنوا أنو مثقف أكتر من بياع الفول بشعرة ... لييييش؟ ... لانو قال أنو الولد لازم يتحمم بيمي درجة حرارتها 38 أو ينحطلوا كمادات مي باردة أو يعود ببانيو في مي فاترة ... ماشي هاد بياع الفول المثقف أكيد بعد 14 سنة من الدراسة عندوا وجهة نظر معينة ... و بعد ما ردو الأهل عليه و حطولوا للولد كمادات مي باردة تحسن بساعتين ...
شو صاير ؟... أكيد ما بعرف ... بس توقعي أنو مو جرثومة لانو مفروض يعطس أو يسعل ... إلخ .
أي شي يمكن صاير معو: ضربة شمس ( الجو كتير شوب ممكن يكون هيك ) ممكن يكون معو خطأ بتنظيم معين بجسموا سبب رفع درجة الحرارة ... طيب شو ممن كان يكون سبب ارتفاع درجة الحرارة الدكتور بيعرف أنو الطفل بيتعافي لحالوا بسرعة من معظم الأمراض ... و بهل الحالة نحنا بس بدنا نعالج الأعراض ...
الكمادات والحمام مو علاج للمرض ... هنن علاج للأعراض ... مضادات الالتهاب اللي عطوهون الأهل للولد هنن علاج للمرض بس مو لحتى يكون مرضان ...
ومن هون الخيار الاصح بالمعطيات اللي عند الطرفين هو خيار الدكتور ... و اللي هو على مبدأ خلينا نعالج الأعراض لانو بهل العمر ممكن يصير كتيير شغلات ترفع درجة الحرارة و تروح ببساطة و بحال ضلت الحرارة بندور (بندور يعني بنبحث عم نوه لاني بس قريت المقال مرة تانية حسيت بتشبه البندورة ... بقا مشان ما حدا يخلط )على علاج تاني ... و بالمقابل حل الأهل كان أنو عطيه تحميلة إذا ما نفعت الأولى بقا التانية بتنفع و إذا ما نفعت التانية التالتة بتنفع و هيك ...
المهم الله يبعد المرض عن الكل و يخلينا ناخد القرار الصحيح دوماً و أنا عم أذكر مشان و ضحلكون الدكتور فهمان قد ماكان مو فهمان بيضل عندو حسابات تانية ...
تم كتابة هذا الموضوع بتاريخ 13/8/2014 ومازال العمل مستمراً...
