التسجيل بالجامعة كان واحد من اكتر التجارب ازعاجا ... من بعد دفتر الجندية طبعاً .
بعد ما تبلش الجامعة وتحضر كم محاضرة بيبلش التسجيل و بتبلش مشكلة التسجيل .
مشان تسجل بالجامعة لازم تجيب مصنف أخضر , في منو بسورية شي 100-200 مصنف لكل طلاب جامعات دمشق . يعني إذا ما لحقت تجيبوا من أول شي , راحت معك كم اسبوع .
بعد ما تجيب المصنف اتأكد أنو الطوابع موجودة فيه . إذا ما فيه طوابع أطلبون من اللي باعك وحتى لو دفعك حقون نص مصيبة لأنو لح تكمل سعادتك إذا قلتلوا عم تنصب علي ( لازم تعرف الطابع تبع الخمسين بيبعوا برا بـ 75 و بالجامعة إذا كان حظك حلو و لقيتوا بـ 50 ) .بدك على ما أعتقد 8 صور وكل وحدة منون بتكتب عليها معلومات انسيت شو هي المعلومات , والمصنف في وراق بتعبيها و حدة متل التحقيق , أديش قياس الشحاطة تبع الحمام بالبيت , شو اسم رفيق الزلمة اللي ساق السيارة اللي نقلوا جدك فيها للدفن ... وهيك شي .
بالنسبة للبنات الله يتم عليكون , ما في ورقة تدريب ... بالنسبة للشباب الله يعينكون ورقة تدريب العسكري أو الله اعلم شو اسمها هي أكتر ورقة لح تعيفكون حياتكون ... المهم أبطء مين خلق الله بالكتابة هو اللي بيسلم الورقة لشي عشرتالاف طالب ...و شوف أديش الدور قصير .
بدكون نصيحة حاولوا تجبوها قبل ما حدا يدرا فيها ... بدك دفتر الجندية أو ورقة التأجيل تبعك .و بكل الأحوال بدك كلمة حلوة ابتسامة عريضة و روح لعند الزلمة و قلوا بدي الورقة بيغط نص ساعة مشان يكتب ورقة 2سم*4سم و بعدين بيقلك الله معك.
مبروك ... خلصت تسجيل اللي بقي عليك نفس شغل البنات :
روح لمكتب الحزب اطلوب ورقة مشان شي شغلى الها علاقة بالتسجيل ... للصراحة أنا رحت مالي عرفان شو اسم الورقة قلتلوا للزلمة بدي ورقة التسجيل بالجامعة عطاني ورقة ألي عبي المعلومات عبيتون...وقع...باي.
وبعدين روح وقف بالدور سلم المصنف .. بيطلبوا منك تدفع رسوم ادفعون .. وغط كم اسبوع و بتستلم البطاقة .
بالنسبة لتبع الموازي الله يعينكون بتتأخروا كتير ... نفس الشي بس الرسوم من البنك و الرسوم أغلى بشي 200 ضعف من رسوم العادي... بس لا تزعلوا ممكن تقسموهون على قسمين .
المهم هادا كلشي إذا في سؤال عن شي معين , إذا بتحبوا أحكي عن شي معين حطوا تعليق تحت و أنا لح قدم جهدي مشان لبي طلباتكم وشكراً.
لح حاول أحكي مشان الوازي و طلاب الجامعات التانية , في عندكون شغلة اسمها طلب حضور شرطي مشان العلمي ... هي بدها معاملة ((للملاحظة هي معاملة )) بس بتخلص .
تم نشر هذا الموضوع في 5\8\2014 و مازال العمل مستمر...
