الموازي وحدة من الشغلات الحلوة ...أولاً ما في ظلم لمعدل الطلاب لأنو النسبة ثابتة و ما بيتغير المعدلات بالموازي ...كمان هي فرصة للطلاب اللي بيقدروا يدفعوا مصاري وبيتمنوا يدخلوا لفرع أعلى بس الشغل لطلاب الموازي أصعب من ناحية التسجيل و التعامل .
أولاً طلاب الموازي ما بيقدروا يسجلوا لحتى تنزل مفاضلة الموازي و ممكن من هون لهداك الوقت يقامر و يحضر محاضرات الفرع اللي بدوا يدخلوا ... ليش قمار ؟ ... لأنو بحال ما قبلوا بالموازي لازم يرجع للفرع الأدنى اللي قبلوا بالعامة و يستدرك التقصير .
المهم الوراق هي :
ورقة سلفة أو دفعة مسبقة بيسلموا لبنك معين ممكن تعرف اسموا و التكلفة هي 25,000 بتاخد الوراق و بتروح للجامعة بتسجل بالمفاضلة بالطريقة العادية . لازم يكون عندك مصنف في ثلاثة طوابع بحث علمي و ثلاثة طوابع لدار المعلمين على ما اعتقد و 9 طوابع مالية من تبع العشرة أو ثلاثة من تبع الثلاثين و بتسلم الوراق بهل الشكل و لازم يكون مع صورة للهوية يمكن أكتر من وحدة.
بس الحكي مو هون ... الحكي اللي بدي أوصلوا هو أنك بتلاقي كل الطلاب متوقعين أنو ينقبلوا بالموازي حتى بعض الطلاب بيتوقعوا ينزل عشرة علامات و بهل النواحي .!! كل هل الكلام كذب الموازي بينزل علامتين أو أقل... و ببعض الأحوال و اللي هي نادرة ممكن تنزل أكتر .
و من وقت بداية الجامعة ولوقت صدور نتائج الموازي لح تلاقي طلاب من الهندسة قاعدين عندكون عم يقولوا المفاضلة لح تنزل شي عشرين علامة أو أكتر :
"و الله جار ابن خالة عمي شاف المفاضلة بعينوا و قلي اسمي من طلاب الطب البشري"
طالب كشاش
المهم أنت لا تشغل حالك أن طلعلك أهلين و سهلين إن ما طلعلك الله يكون بعونك ... هلق إذا طلعلك لح يكمل جمال الموضوع و تبلش معاملة الحضور الشرطي (الشرطي هي من الشرط مو من الشرطة) مشان العملي هل المعاملة مفروض تدبرها مشان تقدر تحصل على امكانية الدوام بالعملي بالجامعة و فيك تسأل عند الديوان مشان تعرف شو بدك تعمل.عل الأغلب بدك صور هوية شي تلت صور , و صورة عن السلفة تبع الـ 25,000 و معاملة بتجيبها من الديوان مع طوابعها بس 180 ليرة و بس ... و صح نصيحة خليها معك طول حياتك .
خلي معك قلم أزرق شو من كان تكون المعاملة المهم يكون معك قلم أزرق .
و بالنهاية بتتأخر تسليم البطاقة و أحياناً لوقت بداية الفحوصات الانتصافية , بس هون المشكلة و ما لح تواجه غير هل المشاكل مشان التسجيل .
سوف أتحدث عن التكميلي و الظلم بالتكميلي بالموضوع الجاي.
تم نشر هذا الموضوع بتاريخ 6\8\2014 و مازال العمل مستمر ...
