التكميلي فكرة حلوة كتييييير ...
أنا هلق بقدم الرياضيات و العلوم و الفيزيا و الكيميا و برسب حالي بالقومية و الديانة و العربي مشان أخد وقت زيادة و أقدر أدرس أكتر
رفقاتي
بالله شو ؟ ... معقول هل الكلام يعني هلق اللي بيدروس و بيقدم نظامي صار متل هاد اللي بيترك تلت مواد و بيأخر التقديم ... بالله شو هلق هاد اللي نقصوا 30 علامة و هاد اللي نقصوا 40 علامة متل هاد اللي نقصوا علامتين .
خود بعين الأعتبار أخر العلامات هي أصعب العلامات ... مشان ترفع هل العلامتين اللي نقصوك بالرياضيات لازم تعيد تلت كتب منها كتاب التحليل اللي لحالوا بيجب الجنان ...و مشان طالب يجيب علامتين من 40 علامة أو 30 علامة نقصوا لازم بس يروح و يقدم مرة تانية .
و كل هل الكلام ظلم ... أنا نقصني 9 علامات بدون التكميلي طالب من الطب البشري المفاضلة العامة نقصوا 25 علامة و العلامات كالتالي :
أنا ... 9 علامات ... 0.2 رياضيات 0.3 فرنسي 0.5 أنجليزي 1.6 فيزيا 4.4 عربي 1.5 علوم 0.5 قومية .
الطالب التاني ...25 علامة ...8 علامات قومية 13 علامة علوم 4 عربي .
نحنا التنين قدمنا موازي :
أنا ... عربي بس ( ما لح عيد تلت كتب مشان 0.2 رياضيات و نفس الشي كسور ).
زميلي ... قومية و علوم 21 علامة .
النتائج :
أنا زدت 4 علامات و صرت 235.
زميلي زاد 21 علامة و صار 236 علامة.
للمرة الترليون ... بالله شو ... دخلت موازي ,و هو دخل عامة .
الفرق الوحيد أني أنا قدمت كلشي بقدر عليه و هو بيعرف أنو هل المادتين لح ينقصوا كتير ... بالوقت اللي كنا عم ننتظر النتائج هو كان عم يدرس المادتين مشان يرفع العلامة كتير .
ما بعرف أنا حسيت القصة ظلم بس الموضوع اختياركم ... ممكن ينقال أنو هو عرف يلعبها صح ... و هاد الكلام صحيح ... ممكن ينقال أنو هاد الشغل مو صح ... و وقتها هاد الشغل ظلم ... بس برجع بذكركم أنا بدي أنصحكم و من وجهة النظر هي , خدوا نصيحتي و العبوا نفس لعبتوا ... استفيدوا من الموقف اكتر ما بتقدروا بدون ما تأذوا حدا ... يعني الموازي انأذينا هلق بالتكميلي بالجامعة ما حدا لح ينأذى بقى استفيد منها و العبها صح ... هي النصيحة مني ألكون ممكن تستفيدوا منها .
المهم هاد الشي كنت قولو لحالي وقت البكلوريا لح قلكون ياه ... قدموا كلشي بقدرتكون و لا تقصروا بشي لانو بس تصلوا للوقت اللي بتحاسبوا فيه حالكون ممكن تدافعوا عن حالكون و تقولوا أنا قدمت اللي علي و هي قدراتي و هي حدودي أنا رضيان .وبس...
بتمنا يكون الموضوع عجبكون , إذا في اقتراح على أي موضوع بتحبوا تسمعوا مني فيكون تكتبوا بالتعليقات تحت ... و ممكن تبعتوا لي رسالة على البريد الالكتروني لح اعمل كل جهدي رد على المواضيع و لح ضيف البريد على الموقع .
الموضوع القادم عن كلام توجيهي للمفاضلة بعد صدور النتائج.
و شكراً لكم ...
تم نشر هذا الموضوع بتاريخ 6\8\2014 و مازال العمل مستمراً ...
