أهداف

للصراحة من زامن   و انا كنت بحب فكرة السوارة أو السنسال أو الشغلات اللي على نفس المبدأ ... كنت شب و كنت مصروع و لهلق في شوية آثار لهل الصرعة و ضليت شبه مقتنع فيهون لمرحلة قررت فيها أنو موضروري أبداً ألبس هيك شي ...

من جديد رجعت لي الفكرة نفسها بس للصراحة هلق مو صرعنا ... رجعت بطريقة عاقلة ... متل أنو هل السوارة اللي لابسها بتحدد أهدافي بتذكرني فيهون ... متل أني ما لازم ضل بمحلي و لازم أمشي لأدام و وصل لهدفي و هل الشي بيذكرني بهدفي و بيذكرني أني لازم التزم بالشي اللي بدي ياه ... غير هيك صار لهل الشي (الي كان بمرحلة من مراحل عمري صرعة )صرلو معنى ...

هل الشغلة حلو و أنا بلشت فيها من بداية 2014 و لساتني لابس سوارة وحدة محدد فيها 7 أهداف و الحمد الله قدرت أنجح بعدد كبير منون ... هدفي الأول كان أني يصير عندي خبرة صغيرة بس هلق بالمجال الطبي مشان إذا حدا احتاجني أقدر ساعد و صار  و أتعلمت إسعافات أولية ...

التانية كان أني أتعلم حرفة يدوية و أهلي أقترحوا علي أشتغل عند معلم خشب بالصيفية بس نزل كتير مستوى الحرفة اليدوية لمرتبة أتعلمت فيها صنع الأساور ( منيحة أحسن من بلا ) ...

الهدف التالت كان  أني أتعلم الفتوشوب بطريقةمنيحة كتير و هلق صرت متعلموا بطريقة ممكن سكج حالي ...

الهدف الرابع كان أرجع أتعلم جيتار هلق متحسن كتير بس لح شيلو من قائمة أهدافي لانو لح يتعارض مع الأهداف الجديدة ...

الخامس كان اني أتعلم كيف أعمل موقع على النت و حاول ساعد العالم منوا ... و هلق ما قدرت أعمل موقع بس قدرت أعمل مدونة وبتوقع لح ضل عم أشتغل حتى ساعد كتير ...متل مبدأ دكتورة ( Puplish or Vanish ) ...

 السادس كان أني أستفيد من مصرياتي و ماخليون ينصرفوا على شي بلا طعمة وهاد حليتو بشريت التاب ... مو كتير هدف خارق بس منيح ...

و السابع و الأخير و هو أني أقرا كتب كتير وصار حتى الآن بس مو بالمعدل اللي كنت بتمنا ... بس الهدف وصلتلوا و اللي هو أدعم رأي مشان الوقت اللي بحتاج فيه حاجج حدا بالمنطق ...

و هدول هنن أهدافي لح حط أهداف جديدة للسنة 2015 و اللي ذكرني بكل هل الشي أني شفت خاتم و قررت أقلب من السوارة للخاتم مشان أهداف 2015 ... هلق صحيح ممكن يكون هل الشي صرعة بس بيضل هدف ألي و بيضل شي أنا لح التزم فيه من قناعة و بيضل مشان يذكرني بأهدافي اللي بدي منها حقق تقدم ...

بتمنى الكل كمان يحقق أهدافوا و بتمنى الكل يصل لمرتبة عالية ... أنا بعرف كتير من طلاب السنة التانية و عنجد بتمنالون الخير لانو في منون طلاب عنجد سكرة و ما بيطلع متلون بالكون كلو ...

مع كامل تحياتي لكل مين عندوا أهداف عم يشتغل ليحققها... و كل مصروع ...

تم كتابة هذا الموضوع بتاريخ 11/8/2014 و مازال العمل مستمراً ...