طيب من شي أسبوع قلت أنو الفريق كأنو عم يصير فيه مشاكل بس مالي متأكد ... أي بعد ما تأكدت في مشاكل خفيفة و كنت بمرحلة من المراحل شاكك أني السبب ... هلق في مرة اقترحت على الفريق نتعامل بحزم أكتر مع العالم اللي مسجلين أسمون بس ما عم يعملو شي ... يتوقع هون صارت المشاكل ...

قرر الفريق يعمل اجتماعين مستعجلين مشان نزبط فعاليتنا الجديدة ... بهل الاجتماعين اللي كان مو دريان شو صاير لقا الغراض عم تصير بسرعة و هاد شكل أحساس عند البعض أنو تركون بدون أي معلومات ...

هلق من وجهة نظر معون حق ... من وجهة نظر تانية عم يعيفونا حياتنا مشان يعملو شي ...

اليوم ضلينا بالاجتماع ساعتين عم نحكي مشان ننجز شي ممكن يخلص خلال عشر دقائق ... و الكلام اللي انحكى كان عناوين ... حتى اليوم الفريق ما عمل شي غير تحديد عناوين أساسية بدون أي تفصيل ...

وهاد الكلام علاك ... مو معقول صرلنا أكتر من 7 أشهر عم نجتمع بس ما قدرنا نحدد شي محرز نشتغل عليه ... ولهلق ما عرفانين شو نعمل ... 

حتى الآن الفريق مشتت ... بدو يعمل الفعالية بس ما حدا مستعد يشتغل ... بدو الفعالية تصير بسرعة بس الكل نسيان انو الفحوصات قربت ... كلو بدو يشتغل شي عظيم بس ما حدا مستعد ياخد بعين الاعتبار أنو الشغل بدو وقت وجهد كبييير ...

أي من جهتي متدايق من الكل ... ما بعرف شو بدي أعمل معون ...

المهم في مجموعة تعديلات عملتها ... من أول ناحية وقفت كتابة الحكم اللي عم نزلها عل المدونة مشان ما اقلب المدونة حكم بس ... من جهة كنت مبسوط أني عم نزل الكتابات ...بس من جهة تانية أنا عامل هل المدونة مشان تكون متل مذكرات أحكي فيها عن الجامعة وحياتي ...

لهل السبب نقلت الحكم لموقع تاني ... نفس الخلفية تبع هل الموقع بس عنوان تانية و شي أحلى ... عم فكر بس خلص فحوصات اتفرغ مشان وسع مجال النشر تبعي ... من وجهة نظر ممكن وسع الموقع التاني و ضيف عليه شوية شغل و صور و رسمات ... 

أي اللي بدوا الموقع التاني هاد عنوانو :
http://dailyquote-sy.blogspot.com/

طيب مشان الفريق على أساس ح نعمل اجتماع تاني بهل الأسبوع ... ح رد خبر مشان شو بيصير ...

مشان الجامعة قربت الفحوصات ... عم جهز ملف النسج التاني مشان ننشروا على المجموعة تبع الفيس ... هل المرة ح نصغر الحجم على حساب الدقة , لانو بأخر مرة ما كتير عالم قدروا ينزلوا الملف لانو الحجم كبير و هنن بيعتمدوا على الـ 3G و هاد الشي مكلف بالنسبة لحجم كبير ...

طيب بس زبط أمور المواقع التانية ح أنشر الخبر عنها و ح حاول يا خلي الحكي بالعربي الفصحة قدر المستطاع يا خلي الحكي بالانجليزي ...

ومازال العمل مستمراً ...

تم كتابة هذا الموضوع بتاريخ 9\5\2015