اليوم كان عندنا فيزيولوجيا... وصلت على المحاضرة و فهمت كل شي ... بالمعنى الحرفي بدون استثناء ... و هاد الشي كتير غريب بالنسبة لألي ...يعني يادوب أفهم شي بالمحاضرة ...
السبب ببساطة أني كنت نايم للساعة 11:00 و فقت مرعوب كتير ... أنا متعود نام ... فيق على حدود الساعة 6 إذا كنت نعسان ارجع نام و فيق بعدها بخمس دقايق ... و هيك بضل كل خمس دقايق عم فيق ... بيصير نومي غير مستقر ... من هون للساعة 6:30 بفيق بشكل رسمي ...
بس اليوم ضليت نايم للساعة 11:00 و هاد الشي بدون أي تقطع ... يعني كنت نعسان بشكل كبير ... بتوقع لاني مبارح ضليت سهران على الكمبيوتر ... عم اتعلم على Flash ... بهل المناسبة كتير حلو هل البرنامج ... يعني في فرق من السما للارض بمستوى اللي لاحظتو بين البرامج تبع الموبايل و هل البرنامج ... على سبيل المثال بدي ساعة مشان زبط حوف الخط بالبرنامج تبع الموبايل و بالمقابل في زر بالـ Flash بيزبط هل الشي ...
و كمان اليوم كنا عم نحكي على مخطط القلب الكهربائي ... و اللي هو إجراء ضروري و روتيني بالمشافي ... يعني الشي اللي عم نتعلموا هو أنو الدكتور لازم يعمل شغلتين بشكل روتيني :
1. قياس الضغط
2. تخطيط القلب
هي الشغلتين ممكن تكشف عن أمراض لسا ما تطورت عند البني آدم و بالتالي ينحمى من أمكانية الإصابة بمرض خطير مستقبلياً ... و بالتالي يوفر على حالوا تكاليف ضخمة بالعلاج ...
عم فكر بس اتخرج و يصير عندي عيادة بدي علق صورة فيها جدولين ... الأول بحط فيها تكلفة الكشفية ... و التاني بحط فيه تكاليف السنوية لأدوية الأمراض اللي ممكن تنكشف بالفحص الدوري عند الطبيب ...
وتحت الصورة بكتب ... و الله الشغلة أرخص لك أنك تراجع طبيب ...
و عنجد هل الشي مو مشان أعمل دعاية لمجالي ... بس عنجد الواحد ممكن يرتاح كتير بس يقي نفسوا ...
وكمان في علم تاني ... هاد العلم قائم على فكرة الوقاية ... تغذية صحيحة , تمارين صحيحة , عادات صحيحة , كل هل الشي بيحمي الإنسان من إمكانية الإصابة بمرض خطير ...
لازم أقرا أكتر عن هل الشغلات ... بيتوقع الباحثون السوريون كانوا عم يكتبوا عن هيك شي ... و في غيرون , صفحة ثقف نفسك كانت كمان عم تكتب عن هيك شي ...
بكل الأحوال ... لح حاول أعمل شي من هل القبيل و أنشر هل الكلام ... و كمان عم أتطور بمجال الـ Flash بتوقع لح أستفيد ...
وهاد كل شي ...
ومازال العمل مستمراً ...
تم كتابة هذا الموضوع بتاريخ 8/12/2014
