وحدة من الشغلات المزعجة كتير هي أنك ما بتعرف شو الشي الصحيح و شو الشي الكذب ... يعني بتفتح على النت و بتقرا الشكولا لاتسبب السمنة ... ؟ كيف يعني هل الكلام . شو شركة كيتكات كتبة هل الكلام ...
بكل يوم بتقرا في مقال بتحس حالك ما بتعرف إذا كلام هل الزلمة موثوق ولا لأ ... يعني شركة التدخين من مصلحتها تقول أنو الدخان لا يسبب السرطان ... و شركة الشكولا من مصلحتها تقول أنو الشكولا مفيدة للأكتئاب ...
و بعض الكتاب بيكتبوا أنو هنن لقوا حل المرض (How Not To Sick Again ) و هاد هو الكتاب اللي مسبب الكتابة عن هاد الموضوع ... بهل الكتاب الكاتب قال أنو سبب الأمراض هي طريقة التغذية ... و ممكن تحسن مقامومتك عن طريق عدم تناول بعض المأكولات ومنها السكر ... هلق أنا ما قريت الكتاب بشكل كامل ... الكاتب ذكر هل الأفكار بحديثوا عن كتابو ... بس إذا فكرنا شوي ليش مايكون الكاتب عم يقول هل الكلام مشان يجذب قرآ بس ...
أنا من جهتي قريت كتير كتب خلتني حس أنو معظم هل الكلام علاك ... يعني متل كتاب "السر " ..." بس أمن بالشي و لح يتحقق "؟؟؟ ... علاك ...
ومن وجهة نظر تانية كيف بدك تعرف الكلام الصحيح ... يعني بمحاضرة لفايز فوق العادة ( رئيس شيي شغلة ) قال أنو الطريقة مشان الإنسان يعيش لفترة طويلة هي انو ماياكول ...
هلق هاد الكلام ممكن يكون منطقي و ممكن يكون لأ ... و للصراحة أنا لح جرب المنطقي و اللأ ... لانو هي الطريقة الصحيحة مشان تتميز ...
تعلمنا بالمدرسة أنو نبصم الكلام اللي مكتوب و نقدم ... صح و لا غلط ... هي مو مشكلتنا العلامة على الكلام الموجود بالكتاب ... و هي الطريقة منيحة ... بتعلم اتباع التعليمات... بس إذا عم نفكر بشي أذا عم نفكر بشي أكبر ... متل التفوق , لازم نشكك باللي عم نقراه و لازم نسمع لكل العالم كمان ... لانو التشكيك مو يعني بس أنك تقول غلط و تمشي ... التشكيك يعني أنك تسمع كل الكلام و تقول في كم شغلة صح و كم شغلة مو صح ...
هيك ممكن الإنسان يستفيد و يفيد و يتفوق ...
أو على القليلة هاد الكلام اللي أنا بصدقوا ...
بكل الأحوال لح دور على هل الكتاب و بلش حملة لاتمرض مجدداً ... و شوف إذا بتزبط و لا لأ ...
و بس مشان نعد عندي هل الحملات :
1. الرياضة 2. الالتزام 3.و لاتمرض .
الأولى لساتني عم أعرج منها
التانية اليوم غبتو كلو
التالتة هلق بلشت فيها
ومازال العمل متسمراً ...
تم كتابة هذا الموضوع بتاريخ 29/9/2014
