هلق بالنسبة للفصل التاني , التزمت اكتر من الفصل الأول بالحضور , و شوي بالدراسة ,
ملف النسج نزلتو من زمان كتيييير و بتوقع طلع منيح , كان عندي اربع أخطاء تعبيرية و خطأ علمي واحد ... بس ما صححت شي بالمجموعة ... بس نزلت الملف طلعلي واحد من الفالحين حاول على اساس ينكش خطأ للملف ... بس كان الكلام معو كتير علاك ... يعني الخطأ مو صحيح و كلامي كان صحيح ... وبس حاولت احكي معو متل العالم طلع كتير مفزلك ...
يمكن ... هلق مو يمكن , أكيد عصبت بس رجع مشان يناقشني بنفس الخطأ خصوصاً انو كان الكلام مو صحيح , و بتوقع اني عصبت زيادة عن اللزوم ... من هداك الوقت وانا مقرر أني صير بيت استخارة قبل ما رد على حدا بالحديث ... يمكن لاني بنفعل كتير لازم اعمل هيك شي ...
المهم بالنسبة لملف النسج الجاية عم نشتغل عليه هلق ... حاولت اطرح على غيث فكرة نشتغل شي مشان الجامعة , بس ما كتير حب الفكرة , يمكن الخطأ من اللزلمة اللي قررت احكي معو , يعني هو كتيييير معت ... عم فكر احكي مع عبد الله ... هاد اللزلمة أروق من غيث , و شغيل أكتر و متفائل ... لازمني هيك شي ...
بالنسبة للفريق انا فقدت احترامي لكل اعضاء الفريق , خصوصاً بعد ما لحظت قديش هنن مستخفين بالعمل تبعنا ... لهيك ح خفض الأولوية تبع الفريق ... لانو مو معقول هل الكلام كنت حاطون على راس أولوياتي طلعوا مو حاطيني بحساباتون بالأصل ... ما في التزام من أي طرف من أعضاء الفريق و الكل بدوا الشغل يوصل لعندوا ... و إذا بدنا نعمل شي لازم يكونوا مرتاحين ... للأسف مين ليش بدو يشتغل الشغل اللي بدوا تعب ؟
هفففف ... لهلق عندي رغبات كتيييرة ... و بالنسبة أني مشغول بالدراسة عم اكتبون اليوم هون مشان اقدر اتذكرون :
- جاي عبالي افتح قناة عل اليوتيوب
- جاي عبالي استسمر بالبورصة
- جاي عبالي اتعلم فيديوهات ثلاثية الابعاد
- جاي عبالي اتعلم كرتية أو شي بيشبهها
- جاي عبالي اتعلم اعمل صور بنورامية 360 درجة
- وجاي عبالي ربي قطة
هلق القطة مستحيل أمي تخليني ربي قطة لهل السبب بدي قيمها من المخطط ... بس البقية ممكنين...
بعد ما خلص فحص التشريح ح حاول شوف شو بقدر اعمل و ح طبقوا ... و للملاحظة عنجد جاي عبالي استسمر بالبورصة ... حبيت الفكرة و حسيت حالي بقدر افهم الغراض تبع الرياضيات و في مواقع عل النت مستعدة تدعم المبتدئين ... ممكن حاول دبر راس مال و جرب ...
صحيح بتضحك الفكرة بس مو مستحيلة ...
أي بتوقع هاد كلشي ... للصراحة من هون لبكرة ممكن يطلع معي شغلات تانية ...
انا تفتحت مواهبي لانو قربنا على وقت الفحوصات و بالتأكيد ما بقدر مرق الفحص بدون ما التهي بمليون شغلة ...
- أي صح كمان جاي عبالي اتعلم قرصنا و برمجة فيروسات ...
- وبدي ربي عصفور و أرنب و فارة ...
- واعمل مجلة ...
وما عم امزح بأي شغلة من هدول عنجد حابب اعملون كلون ... بتوقع أهلي بيسمحولي أعمل أي شي ما عدا شغلة القطة و الفارة و العصفور ...
أي و مازال العمل مستمراً ...
تم كتابة هذا الموضوع بتاريخ 27\4\2015
