اليوم بلشت رسمة التنين اللي كنت ناوي اعملها و جرب كم شغلة من المؤثرات على الرسمة مشان حسن الرسمة وتطلع بتشبه شي واقعي ... هلق أكيد كلامي كتير متفائل بس بحاول بركي بيطلع معي شي ...
المهم بالنسبة لكتب ابراهيم الفقي لح وقف قراية لاني لقيت انو مو محرزة اقراهون كلون باسبوع أو هيك شي ... يعني الكتب مكتوب مشان مفاهيم الدعم النفسي ولازم بفترات زمنية تنقرا ... متل الجرعات , لازم يكون بيناتهون فواصل ...
المهم رسمة التنين حلوة و بتوقع مع النار ح تطلع رائعة بس مالي متأكد من شو بيصير معي من هون لخلص ...
وهي الرسمة :
ولونت الرسمة بألوان قريبة من اللون الأحمر مشان انطباع النار و لانو بتوقع هيك لون التنين...
المهم هاد كلشي بالنسبة للرسم ...
اليوم كان عندنا اجتماع مشان مبادرون وللصراحة ما عملنا هل الشي العظيم ... يعني معظم الوقت لسنا عم ناقش شو بدنا نعمل ... حاسس انو ما لح يطلع منا شي ... بس للصراحة انا معظم الوقت متشائم ... و بالرغم من هيك بمشي بطريقة (إذا ما لح يطلع منا شي ونحنا عم نشتغل , أكيد مالح يطلع ونحنا قاعدين ... صحيح؟)
اي بالنسبة للشغل تبعنا مبارح نزلنا لعند بسمة و اظهرنا دعمنا لبسمة ... للي ما بيعرف بسمة :(بسمة بتهتم بعلاج الأطفال المصابين بسرطان الدم ) و للصراحة ناجحين هنن بشغلون ... نسبة 20% من الاطفال المصابين بسرطان الدم قادرين على التعافي دون علاج , بمساعدة بسمة ارتفعت النسبة لـ 80% و هي للصراحة ممتازة يعني 60% من الاطفال المصابين عم يحظو بفرصة بمساعدة بسمة ...
الحمد الله ... للصراحة دعمنا كان نفسي اكتر من دعم مادي ... لانو التكاليف لعلاج مرضى سرطان الدم مرتفعة بشكل كبير ... ومتل ما قريت تكاليف اللي عم تتكبدها بسمة تقريبا بتساوي 70,000,000 ليرة سوري ... غير الدعم النفسي و مساعدة الأهالي ... الشغلة حلوة ...
اي بتوقع هاد كلشي ... من جهتي بتمنى نضل عم نشتغل هيك شي ... لانو اليوم متل كأنو الفريق ابدا توجه لربح مادي أكتر من مفهوم المساعدة , للصراحة يمكن ما صار هيك شي لاني كنت شارد و فجأة جمعت معون و حسيت هيك شي ... يمكن كون مأخطأ أكيد , لمهم عم نشتغل ومنشوف وين بنصل ...
ومازال العمل مستمراً ...
تم كتابة هذا الموضوع بتاريخ 23\2\2015
