"نستطيع أكثرمما نعلم ".
هاد مو حكمة اليوم ... هاد من واحد من الكتب اللي عم إقراها و اللي عم تحكي عن تنظيم العقل البشري و اللي بيبلش من المرحلةالبدائية والمتمثلة بالطفولة الحالية ... وبعدين بيصل لمرحلة الإنسان المفكر ...
نستطيع أكثر مما نعلم :تعني أننا قادرون على القيام بالكثير من دون الأطلاع على أساسيات الأمور ...فعلى سبيل المثال كل الناس قادرون على الحركةوالسير و الركض ... دون فهم آليات عمل الدماغ سواءً في مراكز التوازن التي تشرف على أستمرارية هذه المهمة أو من دون أدنى فكرة عن تقلص العضلات و أنزلاق خيوط الميوزين على الأكتيين ( أوبالمقلوب مالي متأكد) ...
نستطيع أكثر مما نعلم بتحافظ على مفهوم أن الإنسان قادر على القيام بأمور عديدة تفوق قدرة عقله أو حتى تدريبه ... و بهل الكلام المسبت علمياً ... بحسب كتاب "غاستون فيو" ممكن نصل لانو حدودنا هي بأبسط ما يمكن أوسع مما نحنا عليه بهل الوقت ... كيف يعني ؟
أنا طفل عمري سنتي بفهم كيف أطفي الضو وأشعل ضو ...دون ما أفهم شو دخل الزر باللمبة ...
نستطيع أكثر مما نعلم : هي جملة ما كتير إلها مكان بهل الموضوع أكتر من أني عم فكر بكل العالم اللي بعرفها و عم تقول لحالها
"ما بقدر ... أنا ما بقدر"
بحب قول لكل هل العالم أنتو اللي بتقدروا يعني ...هل الكتاب صعب و أنا ما بقدر جيب علامة تامة بهل المادة ... وأنا ما بفهم على هل الدكتور أو على هل الأستاذ و ما لح جيب علامة عالية ... إلخ .
كل هل الكلام ما لو قيمة لانو بس تقرر أنو حدود مخك عند هل النقطة ... مخك ما لح يتجاوزها ... و بتس تقرر أنو هل النقطة هي مطب أو طلعة بس لح تتعب عليها ... بتلاقي أنو بعد كم يوم خلصت المشكلة و صرت قدام مشكلة تانية ... و كل هل الكلام عم أحكي من خبرة :
أنا بعزوف على الجيتار ... و أول يوم شتريت فيه الجيتار كنت ما بعرف شي ... قلت لحالي بتدرب و بصير منيح ... بس ما تحسنت ... ضليت تلت سنين و أنا يادوب على الأغانية الخفيفة و النغمات البسيطة و بس ... لمرحلة صرت عم بنقل بالمستوى تبعي بسرعة ... الاستاذ تبعي عقب على شغلي و قل لي أنو هلق بتقول الغنية صعبة بتضل عم تشتغل فيها و عم تطلع ملعبجة و بشعة و بتصل لمرحلة بتحس حالك ما لح تتحسن ... بعطيك الغنية اللي بعدها بتحسها أصعب و ما لح تزبط أبداً ... بس بترجع للي قبلها بتلاقيها صارت سهلة ... و صار فيك تلحن فيها متل ما بدك ... بعطيك اللي أصعب منها بتلاقيها كمان صعبة و ما بتخلص بس بترجع للي قبلها بتلاقيها بسيطة كتيييير و حلوة ....
وهيك ... أنت مو لازم توقف بمكان واحد و تقول لحالك ما لح أمشي قبل ما خلص ... لا , مفروض تمشي و أنت مو مخلص ... لانو اللي بعد هو اللي لح يخليك تخلص ... و متل التشريح ... أخدنا العضلات لقيناهون صعبين ... أخدنا الأعصاب لقيناهون أصعب بس رجعنا للعضلات لقيناهون سهلو ... و هيك عل هل المنوال ... (الأصعب بيخلي الألي أسهل منو محفوظ) ...
و من هو نحن نستطيع أكثر مما نعلم ... و حدودنا أكبر بشوي من اللي بنقدر عليه دوماً و بكل يوم بيكبروا و كل ما كبر اللي بتقدر عليه حدودك بتكبر معك ...
و على هل المنوال أنشا الله يفيدكون كمان هل الكلام ...
في قصة تانية على نفس الشي بس مشان العربي ...بحكيها بعدين ...
ومازال العمل مستمراً ...
تم نشر هذا الموضوع بتاريخ 1/9/2014
